Աղանդավորները սպառնում են, որ իրենց խաբեության առթիվ քրեական գործեր չբացվեն

Օրեր առաջ թերթերից մեկն անդրադարձել էր «Խորան միջազգային քրիստոնեական» եկեղեցու «ակտիվ» գործունեությանը: Ըստ այդմ` սույն աղանդը գլխավորող Հրաչյա Խաչատրյանն իր հետևորդներից ոսկյա իրեր է վերցնում ու խոստանում իբրև դրա վրայի չար ուժերը հանել, ինչից հետո ոսկյա զարդերն իրացնում է շուկաներից մեկում:

Փորձեցինք այս աղանդի գործունեության վերաբերյալ տեղեկություններ ճշտել «Քայքայիչ պաշտամունքից տուժածների օգնության և վերականգնողական» կենտրոնի նախագահ Ալեքսանդր Ամարյանից: 

«Ինչպես «Կյանքի խոսք»-ը կամ «Աստծո դեսպանատուն»-ը, սա խարիզմատիկ եկեղեցիներից է, որի հիմնական գործունեության տեսակը խաբեությունն է»,- ընդգծեց Ամարյանը:
Վերջինիս մեկնաբանմամբ` խարիզմատիկ եկեղեցիների հետևորդները մարդկանց մոլորության մեջ են գցում և յուրացնում նրանց թանկարժեք իրերը կամ գումարները:

Նշենք, որ ըստ մամուլի հրապարակումների, «Ազգային երիտասարդական լիգայի» փոխնախագահ Դանիել Պետրոսյանը հայտարարել է, որ Իսպանիայում ծավալում գտած այս աղանդի ներկայացուցիչները շատ ագրեսիվ են ու սպառնում «մայրուղի հանել բոլոր նրանց, ովքեր կկանգնեն իրենց դեմ»: 

Ամարյանն այս սպառնալիքները մեկնաբանեց հետևյալ կերպ. «Մարդիկ հիմա սկսել են բարձրաձայնել այդ ամենի մասին, և քանի որ նրանց գործունեությունը քրեական գործի հիմք է, դրա համար սպառնալիքներ են հնչեցնում»:

HayNews.am